Presidenti i Serbisë, Aleksandar Vuçiq, ka deklaruar se ka zhvilluar një bisedë telefonike njëorëshe me presidentin rus, Vladimir Putin, gjatë së cilës kanë diskutuar për marrëdhëniet dypalëshe, çështjet energjetike, situatën në Ukrainë dhe zhvillimet në Ballkanin Perëndimor.
Vuçiqi e përshkroi bisedën si “e rëndësishme, e mirë dhe përmbajtësore”, duke thënë se ajo ishte e lidhur me çështje të rëndësishme për të ardhmen e Serbisë.
Një nga temat kryesore të bisedës ishte marrëveshja për furnizimin me gaz mes Serbisë dhe Rusisë, e cila skadon më 30 shtator, shkruan “Danas”.
Vuçiqi tha se beson se marrëveshja do të zgjatet dhe se Serbia do të vazhdojë të sigurojë gaz me çmim të favorshëm.
Sipas tij, çmimi do të jetë rreth 318 euro për një mijë metra kub, ndërsa çmimi në tregun botëror, sipas shifrave që ai përmendi, është rreth 868 euro.
Vuçiqi tha se gjatë bisedës me Putinin kanë diskutuar edhe për të ardhmen e Industrisë së Naftës së Serbisë (NIS), duke shprehur shpresën se do të gjendet një zgjidhje e pranueshme për të dyja palët.
Gjatë bisedës është diskutuar gjithashtu për bashkëpunimin dypalësh, situatën në Ukrainë dhe zhvillimet në Ballkanin Perëndimor.
Presidenti serb e falënderoi gjithashtu Putinin për ndihmën e dërguar nga Rusia për shuarjen e zjarreve në Serbi, duke thënë se kjo ndihmë kishte kontribuar në parandalimin e dëmeve më të mëdha.
Në fund të bisedës, Vuçiqi tha se e kishte njoftuar presidentin rus se nesër do të japë dorëheqjen nga posti dhe e falënderoi për bashkëpunimin gjatë 14 viteve të fundit.
Ai tha se shpreson që edhe presidentët e ardhshëm të Serbisë do t’i kushtojnë vëmendje interesave të vendit dhe do të ruajnë një qasje të ekuilibruar dhe të përgjegjshme ndaj aktorëve të rëndësishëm të politikës ndërkombëtare.
