Komisioni Qendror i Zgjedhjeve ka bërë një sqarim për votuesit e regjistruar për votimin me postë.
Përmes një njoftimi, thuhet se shërbimi votues i KQZ-së ka përgatitur pakon me fletëvotim për secilin votues të regjistruar që gjatë regjistrimit ka përzgjedhur këtë mënyrë votimi.
“Në vazhdim të përgatitjeve për fillimin e votimit me postë, shërbimi votues i KQZ ka përgatitur pakon me fletëvotim për secilin votues të regjistruar që gjatë regjistrimit ka përzgjedhur këtë mënyrë votimi. Deri më tani, një numër i madh i pakove janë pranuar nga operatori ekonomik, DHL, i cili gjatë ditëve në vazhdim do të fillojë t’i dërgojë në adresë të votuesve të regjistruar në shtete të ndryshme të botës”.
“KQZ sqaron votuesit e regjistruar se janë duke pranuar sms ose e-mail nga DHL ku njoftohen se çdo pako ka një kod gjurmimi, përmes së cilit votuesi mund ta përcjellë vendndodhjen e dërgesës. Gjithashtu, njoftimi i përcjellë nga operatori ekonomik, u jep mundësi votuesve që të përzgjedhin ta pranojnë dërgesën në adresën e tyre apo ta tërheqin personalisht në pikën më të afërt të DHL”, thuhet në njoftimin e KQZ-së.
