VLEN: Besojmë që Thaçi dhe të tjerët do të lirohen të mërkurën

Subjekti politik shqiptar, në pushtet në Maqedoninë e Veriut, VLEN ka thënë se uron dhe beson që katër krerët e UÇK-së do të lirohen të mërkurën.

Në një njoftim për media, VLEN shprehu përkrahjen për katër udhëheqësit e luftës së UÇK-së të cilët përballen me akuza për krime lufte.

Sipas VLEN, lufta e UÇK-së është një ndër periudhat më të lavdishme të historisë së kombit.

Njoftimi i plotë:

Lufta çlirimtare e Kosovës dhe rrugëtimi i saj drejt pavarësisë janë ndër periudhat më të ndjeshme, por edhe më të lavdishme të historisë sonë të përbashkët. Ne shqiptarët e kemi ende të gjallë kujtesën për vuajtjet, sakrificat dhe qëndresën e shqiptarë përballë një regjimi represiv.

Lufta e Ushtrisë Çlirimtare të Kosovës ishte luftë e drejtë, e pastër dhe çlirimtare për liri, dinjitet dhe mbijetesë. Mbi sakrificën e dëshmorëve dhe luftën e shqiptarëve të Kosovës për liri janë ngritur themelet e Republikës së pavarur të Kosovës.

Rexhep Selimi, Jakup Krasniqi, Hashim Thaçi dhe Kadri Veseli sot përballen me një proces të rëndë, por akuza nuk është aktgjykim. Presumimi i pafajësisë është parim themelor i drejtësisë dhe duhet të respektohet deri në fund.

Republika e Kosovës është realitet i pakthyeshëm dhe rezultat i një sakrifice të jashtëzakonshme. Ajo u ndërtua mbi gjakun e dëshmorëve, mbi qëndresën e shqiptarëve dhe mbi luftën e Ushtrisë Çlirimtare të Kosovës

VLEN qëndron pranë Republikës së Kosovës, pranë shqiptarëve të Kosovës dhe pranë vlerave të luftës së UÇK-së.

Historia nuk rishkruhet me akuza.

Shpresojmë dhe besojmë që Rexhep Selimi, Jakup Krasniqi, Hashim Thaçi dhe Kadri Veseli do të kthehen të lirë pranë familjeve të tyre.