Vidhen gjeneratorë, kontejnerë dhe pajisje në objektin e braktisur të RTK-së, dëmi rreth 30 mijë euro

Një vjedhje e rëndë është raportuar në fshatin Bakshi të Obiliqit, ku persona të panjohur kanë depërtuar në një objekt të braktisur të Radio Televizionit të Kosovës (RTK).

Nga objekti, të dyshuarit kanë marrë një gjenerator, kontejnerë dhe pajisje të tjera, vlera e të cilave llogaritet të jetë rreth 30 mijë euro.

Në raportin 24-orësh, Policia e Kosovës ka bërë të ditur se rastin e ka raportuar një mashkull kosovar, ndërsa me vendim të prokurorit, rasti vazhdon të hetohet.

“Ankuesi mashkull kosovar, ka raportuar se në një objekt të braktisur të RTK-së, persona të panjohur kanë depërtuar brenda objektit dhe nga aty kanë arritur të marrin gjenerator, kontejnerë dhe pajisje të tjera në vlerë rreth 30.000€. Me vendim të prokurorit rasti vazhdon të hetohet”, thuhet në raportin 24-orësh të Policisë së Kosovës.