Ka ndërruar jetë, veterani i arsimit, Sadri Azem Cahani, shkruan GazetaDemos.
Lajmin për vdekjen e tij e ka bërë të ditur profesori, Besim Muhadri, i cili shkroi pak nga biografia e tashmë të ndjerit.
Sadri Cahani lindi më 6 qershor 1953 në fshatin Cahan (Kishaj) të Hasit, të pjesës së Shqipërisë Londineze. Që në fëmijëri, jeta e tij u shënua nga vështirësi të mëdha historike e politike, kur familja e tij u detyrua të shpërngulej drejt Kosovës. Megjithë sfidat e rënda, ai nuk u nda kurrë nga dashuria për dijen, arsimin dhe atdheun.
Arsimin fillor dhe të mesëm e kreu në Shtime, ndërsa studimet e larta në Shkollën e Lartë Pedagogjike “Bajram Curri” në Gjakovë, duke u formuar si mësues me vlera të larta profesionale dhe njerëzore.
Karrierën në arsim e nisi në vitin 1973 dhe për dekada me radhë kontribuoi në edukimin e brezave të rinj në disa shkolla të Kosovës, duke lënë gjurmë të pashlyeshme te nxënësit dhe kolegët e tij.
Për shkak të rrethanave politike dhe qëndrimit të tij dinjitoz kombëtar, u përball me përjashtim dhe padrejtësi, por asnjëherë nuk u dorëzua. Pas një periudhe të vështirë pune jashtë arsimit, ai u rikthye sërish në misionin e tij fisnik, duke dhënë kontribut të çmuar deri në daljen në pension në vitin 2018.
