Një person është ndaluar për 48 orë lidhur me vdekjen e një punëtori në KEK, ka njoftuar Prokuroria Themelore në Prishtinë.
Sipas Prokurorisë, aksidenti ka ndodhur sot, gjatë transportit dhe zhvendosjes së kabllove 6kV, ku viktima dyshohet se ka rënë në kontakt me tensionin elektrik dhe ka pësuar lëndime të rënda, si pasojë e të cilave ka humbur jetën.
Në vendin e ngjarjes kanë dalë Policia e Kosovës, KPMM-ja, Inspektorati i Punës dhe Inspektorati i Brendshëm i KEK-ut, të cilët kanë ndërmarrë veprimet hetimore për zbardhjen e rrethanave të rastit.
“Në kuadër të veprimeve hetimore të ndërmarra deri më tani, është ndaluar një (1) person me inicialet A.K., për 48 orë, nën dyshimin e kryerjes së veprës penale ‘’Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës’’, nga neni 358 i Kodit Penal të Republikës së Kosovës”.
“Prokurori i çështjes, brenda afatit ligjor, do të shqyrtojë rrethanat dhe provat e grumbulluara si dhe do të ndërmarrë të gjitha veprimet e nevojshme, duke përfshirë edhe kërkesën për caktimin e ndonjërën prej masave të sigurisë ndaj të pandehurit në procedurë penale në përputhje me dispozitat ligjore në fuqi”, thuhet në komunikatën nga Prokuroria.
