Vajza e profesorit Jashar Dacaj prek me fjalët e saj pas vizitës së Ramush Haradinajt për ngushëllime: E kuptuam sa i madh ishte kontributi yt

Kryetari i AAK-së, Ramush Haradinaj, ka qëndruar në Irzniq të Deçanit për t’i shprehur ngushëllime familjes Dacaj pas ndarjes nga jeta të profesorit, Jashar Dacaj, shkruan Gazeta Demos.

Haradinaj tha se me familjen Dacaj ndau dhimbjen për humbjen e profesorit të tij të dikurshëm, duke vlerësuar lart kontributin e Jashar Dacajt në edukimin dhe formimin e shumë brezave.

“Ndava dhimbjen me familjen Dacaj, pas ndarjes nga jeta të mësuesit Jashar Dacaj, profesorit tim të dikurshëm, i cili tërë jetën u vu në shërbim të edukimit të brezave”, ka shkruar Haradinaj.

Vizita e Haradinajt tek familja Dacaj ngjalli emocione të veçanta edhe te familjarët e të ndjerit. Pas ngushëllimeve, vajza e profesorit Jashar Dacaj publikoi një mesazh prekës kushtuar babait të saj dhe vizitës së ish-nxënësit të tij.

“Lok, sot për ngushëllime erdhi nxënësi yt, Ramush Haradinaj. E kuptuam edhe një herë sa i madh ka qenë kontributi yt si mësues dhe sa respekt ke fituar me punën tënde të ndershme”, ka shkruar ajo, në një postim në Facebook.