Komandanti i misionit të KFOR-it të udhëhequr nga NATO, Gjeneralmajor Özkan Ulutas, ka zhvilluar një takim në Beograd me shefin e Shtabit të Përgjithshëm të Forcave të Armatosura të Serbisë, Gjeneralin Milan Mojsiloviq.
Lajmi është bërë i ditur nga KFOR, i cili njoftoi se Ulutas dhe Mojsiloviq kanë zhvilluar një “diskutim produktiv për një sërë çështjesh”.
Sipas njoftimit, takimi është pjesë e komunikimeve dhe kontakteve të rregullta ndërmjet KFOR-it dhe ushtrisë serbe.
“Takimi ishte pjesë e komunikimeve dhe ndërveprimeve të rregullta ndërmjet KFOR-it dhe Forcave të Armatosura të Serbisë, të cilat janë thelbësore për ruajtjen e mirëkuptimit dhe bashkëpunimit të ndërsjellë, në dobi të stabilitetit rajonal”, thuhet në njoftim.
