Ulja e tensioneve në Lindjen e Mesme, bie çmimi i naftës në tregje

Çmimi i naftës po bie sot (14 prill), ndërsa tregu duket se beson pjesërisht në një ulje të tensioneve të konfliktit në Lindjen e Mesme, pas deklaratave të reja të Donald Trump, i cili tha se “pala iraniane e kontaktoi me telefon”.

Pasdite, çmimi i naftës ‘Brent’ për dorëzimin ra me 0.86%, në 98.51 dollarë për fuçi.

Nafta përkatëse e papërpunuar amerikane (West Texas Intermediate – WTI) për dorëzimin në maj ra me 1.99% në 97.11 dollarë për fuçi.

“Tregu po e dëgjon Trumpin dhe po e beson narrativën se lufta do të përfundojë së shpejti”, shpjegoi Arne Lohmann Rasmussen, një analist në Global Risk Management.

“Mund t’ju them se pala tjetër na telefonoi. [Iranianët] donin të bënin një marrëveshje, me çdo kusht”, tha Donald Trump dje, të hënën, pas dështimit gjatë fundjavës së bisedimeve në Pakistan për t’i dhënë fund luftës në Lindjen e Mesme.

Presidenti amerikan tha gjithashtu se 34 anije kaluan nëpër Ngushticën e Hormuzit të dielën, “numri më i madh deri më tani që nga fillimi i kësaj mbylljeje të pakuptimtë” nga Irani.

Ai nuk specifikoi se çfarë lloj anijesh kaluan nëpër ngushticë. Sipas firmës së analizave Kpier, vetëm 13 anije që lidheshin me transportin e lëndëve të para kaluan nëpër ngushticë të dielën.

“Po bëhen përpjekje për t’i rikthyer të dyja palët në tryezën e negociatave”, tha sot për AFP-në një burim i lartë pakistanez.

“Tregu është i bindur se kjo luftë ka hyrë në një fazë të re, e cila do të çojë në përfundimin e luftimeve dhe rihapjen e rrugës detare”, sipas Kathleen Brooks, një analiste në XTB.