Kandidati i AAK-së për deputet në Kuvend, Besnik Krasniqi i cili mban numrin 23 në listë ka listuar disa nga sukseset që Aleanca i shënoi për vendin.
Ai theksoi kontributin e tyre në çlirimin dhe ndërtimin e vendit, teksa vlerësoi punën e bërë për themelimin e ushtrisë.
“Kush jemi ne? Ne jemi ata që e çliruam vendin. Ne jemi ata që e ndërtuam shtetin. Ne jemi ata që e bëmë ushtrinë. Ne jemi brezi që sakrifikoi, u vetmohua dhe nuk u ankua”, tha Krasniqi.
Ai gjithashtu shprehu ndjenjën e madhe atdhetare, duke shtuar se nuk do të mungojë bashkëpunimi edhe me aleatë, me të cilët tha se do të punojnë për një ekonomi më të fortë të vendit.
“Kosova nuk lindi rastësisht, u ndërtua nga breza me gjak, me mund dhe me qëndresë. Ne jemi brezi i fundit i shtetndërtimit. Dhe askush më shumë se ne nuk e ndjen, nuk e mbron dhe nuk e do Kosovën tonë. Së bashku me aleatët tanë, për një Kosovë me ekonomi të fortë, me zhvillim real dhe me mirëqenie për qytetarin”, shtoi Krasniqi.
