Trupi Gjykues për shtyrjen e vendimit për ish-krerët e UÇK-së: Përgjegjësia duhet të shqyrtohet individualisht dhe me kujdes

Trupi Gjykues i Gjykatës Speciale në Hagë ka vendosur ta shtyjë edhe një herë shpalljen e aktgjykimit në çështjen gjyqësore ndaj katër ish-krerëve të Ushtrisë Çlirimtare të Kosovës, duke e caktuar përfundimisht 16 shtatorin si datën për ta kumtuar vendimin.

Në vendimin e publikuar të mërkurën, Trupi Gjykues thekson se një zgjatje e mëtejshme e afatit është “absolutisht e nevojshme” për shkak të vëllimit të jashtëzakonshëm të provave dhe kompleksitetit të çështjes.

Sipas arsyetimit të gjykatës, gjatë procesit janë administruar dëshmitë e rreth 270 dëshmitarëve, janë pranuar në prova 5.467 materiale provuese, ndërsa transkripti i procedurës arrin në 29.238 faqe. Po ashtu, gjykata vlerëson se çështja mbulon ngjarje që shtrihen në më shumë se një vit e gjysmë, përfshin një numër të madh vendesh ku pretendohet se janë kryer krime dhe shumë incidente individuale.

Trupi Gjykues thekson se, përveç kompleksitetit të provave, procedura ka të bëjë me akuza ndaj katër të akuzuarve, përgjegjësia e secilit prej tyre “duhet të shqyrtohet individualisht dhe me kujdes”.

“Trupi Gjykues konsideron se një zgjatje e mëtejshme është domosdoshmërisht e nevojshme në kuptim të Rregullës 159(1). Trupi Gjykues rikujton se, siç është përcaktuar në Urdhrin për Zgjatjen e Afatit për Shpalljen e Aktgjykimit të Shkallës së Parë: (i) ka pranuar provat e rreth 270 dëshmitarëve (gojarisht dhe me shkrim); (ii) ka pranuar në prova 5.467 materiale provuese; (iii) transkripti i këtyre procedurave ka 29.238 faqe; dhe (iv) ndërlikueshmëria e procedurës në këtë çështje, përkatësisht fakti që ngjarjet e çështjes mbulojnë më shumë se një vit e gjysmë dhe përfshijnë një numër të madh vendesh ku pretendohet se janë kryer krime, si dhe një numër të konsiderueshëm incidentesh individuale. Për më tepër, procedurat kanë të bëjnë me akuza ndaj katër të akuzuarve, përgjegjësia e të cilëve duhet të shqyrtohet individualisht dhe me kujdes. Duke pasur parasysh sa më sipër, për të siguruar që ai të mund të kryejë një vlerësim të plotë dhe të drejtë të tërësisë së provave dhe të japë një opinion të arsyetuar që merr parasysh vëllimin e konsiderueshëm të provave dhe ndërlikueshmërinë e procedurës, Trupi Gjykues është i bindur se një zgjatje e mëtejshme është domosdoshmërisht e nevojshme”, thuhet në vendim.

Gjykata thotë në vendim se të akuzuarit kanë të drejtë të gjykohen brenda një afati të arsyeshëm dhe se është e vetëdijshme për kohën që ata kanë kaluar në paraburgim. Megjithatë, sipas vendimit, një shtyrje shtesë prej pak më pak se 60 ditësh nuk do t’u shkaktojë atyre paragjykim të panevojshëm, ndërsa është e domosdoshme për të siguruar një vlerësim të plotë, të drejtë dhe të arsyetuar të të gjitha provave.

“Trupi Gjykues pranon se, në përputhje me nenin 21(4)(d), të akuzuarit kanë të drejtë të gjykohen brenda një afati të arsyeshëm. Trupi Gjykues është i vetëdijshëm për kohën që të akuzuarit kanë kaluar tashmë në paraburgim dhe për nevojën që procedurat të zhvillohen sa më shpejt që të jetë e mundur. Megjithatë, duke pasur parasysh rrethanat e çështjes, Trupi Gjykues është i bindur se një zgjatje shtesë për një periudhë pak më të shkurtër se 60 ditë nuk do t’u shkaktojë paragjykim të panevojshëm të akuzuarve. Zgjatja arsyetohet nga nevoja për të siguruar një vlerësim të drejtë, gjithëpërfshirës dhe të arsyetuar të dosjes së provave, si dhe nga kërkesa për një opinion të arsyetuar me shkrim që pasqyron me saktësi atë dosje. Trupi Gjykues është i bindur se asnjë zgjatje më e shkurtër nuk do t’i mundësonte atij t’i përmbushte në mënyrë të duhur përgjegjësitë e tij”, thuhet në vendim.

Trupi Gjykues tha se aktgjykimi i Shkallës së Parë do të shpallet “publikisht në emër të popullit të Kosovës dhe në prani të të akuzuarve, përveç rasteve kur rrethana të jashtëzakonshme e arsyetojnë mungesën e tyre”.

“Trupi Gjykues konsideron se caktimi i një date, në këtë fazë, për shpalljen e Aktgjykimit të Shkallës së Parë u siguron njoftim të drejtë dhe në kohë të gjithë personave të interesuar”, thuhet në vendimin që mban nënshkrimin e kryetarit të Trupit Gjykues, Charles Smith.