Kryetari i Komunës së Prizrenit, Shaqir Totaj, ka deklaruar se ka qenë kërkesë e vetë kryetarit të Partisë Demokratike të Kosovës, Bedri Hamza, që të mos propozohen si kandidatë për deputetë, emrat të cilët në zgjedhjet e 28 dhjetorit dyshoheshin për manipulim me vota.
Me përfshirjen e Nait Hasanit, Totaj deklaroi se i bie që vetë kryetari Hamza nuk e respektoi atë që e kërkoi.
Ish-deputetit të kësaj partie, Nait Hasanit, iu minusuan mbi 6 mijë vota nga rezultati i zgjedhjeve të dhjetorit.
Totaj në emisionin “tre8tre” në KTV, deklaroi se dega e PDK-së në Prizren nuk e ka propozuar Hasanin e asnjë emër tjetër që i është pëmendur emri për manipulim me vota.
“Ne nuk e kemi propozuar emrin e asnjë personi që është përmendur për manipulim të votave. Secili person që është përmendur a është fajtor apo jo ne nuk e dijmë derisa të vijë një verdikt ligjor. Ne kemi reflektuar por Nait Hasani është aty, ka edhe të tjerë aty, nuk dua të përmend emra. Vetëm dua të them që ne kemi respektuar kërkesën e kryetarit. I bie që kryetari (Bedri Hamza) e ka kërkuar vetë e nuk e ka respektuar”, ka thënë Totaj.
Totaj nuk është kandidat për deputet në zgjedhjet e parakohshme të 7 qershorit. Ai ka deklaruar se qytetarët e kanë votuar për kryetar të Prizrenit dhe këtë e respekton.