Time Kadrijaj: Qeveria e keqmenaxhoi rastin ‘Banjska’ – Sot jemi nën sanksione, asgjë s’mjafton për familjen Bunjaku

Kadrijaj tha se Qeveria e Kosovës ka dështuar të kapitalizojë politikisht dhe diplomatikisht ngjarjen e Banjskës, ku dy vite më parë u vra rreshteri i Policisë së Kosovës, Afrim Bunjaku.

“Kjo qeveri rastin Banjskë o dasht ta shfrytëzoj për trajtimin serioz dhe diplomatik të rastit”, u shpreh ajo.

Kadrijaj theksoi se përkundër mundësisë që Kosova të fitonte mbështetje më të madhe ndërkombëtare pas sulmit, veprimet e njëanshme dhe mungesa e koordinimit me partnerët strategjikë e kanë futur vendin në izolim ndërkombëtar.

“Përkundrazi, me veprimet e njëanshme dhe të pa koordinuara, ne jemi vend nën sanksione edhe evropiane edhe amerikane”, deklaroi deputetja e AAK-së , në një prononcim për Lajmi.net.

Duke komentuar edhe kujdesin institucional ndaj familjes së heroit Afrim Bunjaku, Kadrijaj tha se përkushtimi nuk është i mjaftueshëm dhe se çdo veprim duhet të shkojë përtej ceremonive formale.

“A po bahet mjaftueshëm për familjen Bunjaku? Çka do që ban, nuk ashtë e mjaftueshme”, theksoi ajo.

Afrim Bunjaku u vra më 24 shtator 2023 gjatë një sulmi të armatosur në fshatin Banjskë të komunës së Zveçanit, ku forcat e Policisë së Kosovës u përballën me një grup të armatosur serb, të cilësuar nga autoritetet si organizatë terroriste. Sulmi u dënua edhe nga bashkësia ndërkombëtare.