Spiropali u prit në Kullën e Jasharajve: Kjo Kullë s’është thjesht monument, është dëshmi se liria ka pasur çmim

Kryediplomatja e Shqipërisë, Elisa Spiropali e ka nisur vizitën e saj në Kosovë me homazhe në Kompleksion Memorial “Adem Jashari”, në Prekaz.

Spiropali bashkë me Ministrin për Punë të Jashtme të Kosovës, Glauk Konjufca, kryen homazhe në Kompleksin Memorial “Adem Jashari”.

Të dy më pas u pritën në Kullën e Jasharajve.

Postimi i Spiropalit:

Prekaz- Ka vende ku fjalët bëhen të vogla.

Sot, bashkë me Zëvendëskryeministrin e Parë dhe Ministrin për Punët e Jashtme dhe Diasporën, Glauk Konjufca, u përulëm në Kompleksin Memorial “Adem Jashari”, aty ku sakrifica e një familjeje u kthye në themel të një shteti.

Në Prekaz nuk përkujtohet vetëm një betejë.

Përkujtohet vendimi për të mos u dorëzuar.

Kulla e Jasharajve, ku u pritëm prej Bacë Rifat Jasharit, nuk është thjesht monument.

Është dëshmi se liria ka pasur çmim – dhe ai çmim është paguar me jetë.

Këtu ndjen peshën e historisë, por edhe përgjegjësinë e së ardhmes.

Liria nuk është trashëgimi automatike. Ajo kërkon dinjitet, unitet dhe drejtësi çdo ditë.

Prekazi nuk na kërkon lot.

Na kërkon të jemi të denjë.