Specialja thotë se Veseli ishte anëtar kyç në zbatimin e qëllimit të përbashkët kriminal

Trupi gjykues në Hagë ka konstatuar se Kadri Veseli dha kontribut në zbatimin e qëllimit të përbashkët kriminal dhe ishte anëtar kyç në realizimin e tij.

Sipas gjykatësit Charles Smith, Veseli veproi së bashku me të akuzuarit e tjerë në zbatimin e këtij qëllimi. Ai ka qenë shef i Drejtorisë së Zbulimit dhe Kundërzbulimit (ZKZ), e cila kishte përgjegjësi për identifikimin, sigurimin e informacionit, vëzhgimin dhe neutralizimin e personave që konsideroheshin kolaboracionistë.

Sipas trupit gjykues, Drejtoria e Zbulimit ishte një nga mjetet kryesore përmes të cilave u zbatua qëllimi i përbashkët kriminal, ndërsa Veseli ishte anëtar kyç në këtë proces.

“Veseli, së bashku me të akuzuarit e tjerë, emëroi persona kyç në pozita për të jetësuar qëllimin e përbashkët. Veseli mori pjesë dhe inkurajoi kryerjen e krimeve. Ai u përfshi në procesin e identifikimit dhe shënjestrimit të kundërshtarëve, shumë prej të cilëve edhe u vranë. U mor personalisht me arrestimin, ndalimin dhe vrasjen e paligjshme të Behajdin Hallaqit, si dhe me arrestimin, ndalimin dhe lirimin e një të ndaluari tjetër nga UÇK-ja. Veseli kishte dijeni për krimet e kryera kundër kundërshtarëve dhe, me gjithë dijeninë që kishte, nuk ndërmori asnjë hap për parandalimin, hetimin ose ndëshkimin e këtyre krimeve”, ka thënë ai.