Shukri Buja premton transport publik falas për nxënësit: Do ta krijojmë stacionin e ri të autobusëve, e lidhje të rregullta

Kandidati i PDK-së për kryetar të komunës së Lipjanit, Shukri Buja ka udhëtuar mëngjesin e sotëm me autobus nga Lipjani në Prishtinë, për t’t parë nga afër vështirësit e transportit.

Në bashkëbisedim me udhëtarët, Buja u njoftua për vonesat e mungesën e lidhjeve të rregullta, për të cilat premtoi zgjidhje.

“Sot, në udhëtimin tim me autobus drejt Prishtinës, u ula pranë nxënësve që çdo mëngjes nisen herët për në shkollë, pranë punëtorëve që rendin drejt punës dhe pranë qytetarëve që çdo ditë e përballojnë vështirësinë e transportit.

Ata më treguan për vonesat, për mungesën e lidhjeve të rregullta dhe për nevojën e madhe për një zgjidhje moderne. Dhe unë u thashë: kjo nuk do të mbetet vetëm bisedë, por zotim ynë i përbashkët”.

Buja tha se zgjidhja e PDK-së rreth eliminimit të vështirësive të transportit do të jetë:

– Stacion i ri i autobusëve në Lipjan;

– Lidhje të rregullta mes qytetit dhe fshatrave;

– Transport publik falas për nxënësit.

“Autobusi i mëngjesit nuk ishte vetëm udhëtim, por një takim i vërtetë me jetën reale të qytetarëve të Lipjanit”, shtoi ai.