Shtylla elektrike buzë rrëzimit në Podujevë, banorët thirrje komunës: Intervenoni, para se të ndodhë ndonjë tragjedi

Banorët e Rrugës "Tetova" në Podujevë, kanë shprehur shqetësimin e tyre të thellë për gjendjen mjaft të rënduar të një shtylle elektrike prej betoni, e cila është anuar rëndshëm dhe rrezikon të rrëzohet nga çasti në çast. 

Siç shihet edhe nga pamjet, shtylla është dëmtuar dhe po mbahet e mbështetur për gardhin e një shtëpie private.

Për më tepër, kabllot elektrike janë varur shumë ulët, pothuajse deri afër tokës.

Kjo përbën një rrezik direkt për fëmijët dhe nxënësit e shkollës që kalojnë çdo ditë në këtë rrugë, të cilët lehtësisht mund t'i prekin ato. 

Përveç rrezikut nga goditja elektrike, ekziston frika se një shembje e mundshme e shtyllës mund të godasë ndonjë automjet në lëvizje ose vetë kalimtarët. 

Përkundër rrezikut të evidentuar, sipas banorëve, deri më tani nuk është ndërmarrë asnjë masë sanimi.

Gjithashtu, banorët u bëjnë thirrje urgjente organeve kompetente dhe kompanisë së distribuimit të energjisë elektrike që të ndërhyjnë sa më parë për zëvendësimin e shtyllës, para se të ndodhë ndonjë tragjedi.