Publicisti, Blerim Shala, ka rrëfyer në emisionin VOX Data, me gazetarin Lirim Mehmetaj, periudhën kur shqiptarët kishin gjetur formulën e krijimit të sistemit paralel përbrenda atij shtetëror shtypës të Jugosllavisë dhe rolin e ish-Presidentit të Kosovës, Ibrahim Rugova në të. Siç tregon Shala, krijimi i një sistemi paralel kishte disa efekte pozitive për shqiptarët.
“E para, mos me leju shqiptarët me mbet krejtësisht të mbyllur, po me zhvillu një jetë. E dyta, me i tregu Perëndimit që thjesht më s’janë legjitime institucionet e Serbisë në Kosovë. E treta, me tregu që ka kapacitet shtetformues… ”, thotë.
“Rugova instaloi konceptin e tolerancës politike dhe qytetëruese. Shiko, mos të ishte ky koncept, të cilin normalisht si elitë politike, si elitë qytetëruese, e kemi përqafuar dhe e kemi mbështetur të gjithë, nuk do të kishte gjasa të ketë sukses aksioni i Pajtimit të Gjaqeve”, thotë Shala.
“Po solidariteti ka qenë po ashtu shumë i madh, që është fenomen që as sot e kësaj dite nuk ekziston qysh ka ekzistu në vitet e ’90-ta..”.
Siç shprehet Shala, strategji e Rugovës ishte që “të krijohet një amnesti e përgjithshme”, ku të gjithë që duan të punojnë për Kosovën, “janë të mirëseardhur”.
“Pa marrë parasysh a kanë qenë më herët komunistë, a kanë qenë ballistë, a kanë qenë të majtë, a kanë qenë të djathtë, a i kanë shërbyer dikujt a jo”, thotë.