Shala i LDK-së publikon dokumente që dëshmojnë shkeljet gjatë mandatit të shkuar në komunën e Suharekës

Kandidati për kryetar të Suharekës nga Lidhja Demokratike e Kosovës, Ardian Shala është përballur në debat me kryetarin aktual të kësaj komune Bali Muharremaj, dhe kandidatët për kryetar në mandatin e ardhshëm, shkruan GazetaDemos.

Shala diskutoi në lidhje me ndërtimin e disa rrugëve të cilat kanë mbetur pa përfunduar, madje edhe pa filluar fare asfaltimi i tyre, të cilat janë paguar.

Pra, kandidati i LDK-së për kryetar, Shala nxorri në pah se ka anashkalime të shumëta të vendimeve të asamblesë komunale.

“Është shkelje e rëndë ligjore në bazë të kodit penal, është vepër penale”, i tha Shala Muharremajt.

“Rruga, Tucia në Sopi, faza e parë, faza e dytë, dy herë e paguar, dhe askund e shtruar, kam shkuar dhe e kam parë askund e shtruar” shtoi ai gjatë debatit.

I njëjti ka publikuar edhe disa dokumente që konfirmojnë shkelje të ndryshme në mandatin e shkuar.

Postimi i plotë i tij:

Të dashur qytetarë,

Kur i referohemi dokumenteve zyrtare që dëshmojnë shkelje ligji, kjo nuk është fyerje e as ofendim por është mbrojtje e interesit tuaj.

Ofendim i vërtetë dhe fyerje për qytetarët është shkelja e ligjit dhe paraqitja në rolin e viktimës e manipulimi për të shmangur përgjegjësinë.

Unë do të vazhdoj të them të vërtetën dhe të mbroj parimin e sundimit të rendit e ligjit si dhe të barazisë qytetare.