Sërish shtyhet fillimi i dëshmive të dëshmitarëve të mbrojtjes në Speciale

Dhomat e Specializuara të Kosovës në Hagë kanë njoftuar se e kanë aprovuar kërkesën e mbrojtjes për shtyrjen e fillimit të dëshmive të dëshmitarëve. Fillimisht, seancat ishin planifikuar të nisnin në korrik, më pas u shtynë për gusht, dhe tashmë me kërkesë të mbrojtjes, ato janë caktuar të fillojnë në shtator.

Avokati Taulant Hodaj tha se mbrojtja është dashur të përgatitet me dëshminë e dëshmitarëve më herët, që mos të prolongohet çështja.

“Mbrojtja e Thaçit dhe Jakup Krasniqit kanë më shumë dëshmitarë se sa e Selimit dhe e Veselit. Ata i kanë paraparë strategjitë e tyre që mendojnë se janë të nevojshme kur nuk ka shumë dëshmitarë, kjo mund të nënkuptojë që ata janë të bindur që dëshmitarët e Prokurorisë kanë qenë në rregull dhe nuk ka nevojë për dëshmitarë shtesë për të argumentuar mbrojtjen e vet”, tha ai për RTK.

Ndërsa, avokati Ardian Bajraktari ka vënë në dukje problemet që lidhen me kohën e kufizuar që i është dhënë mbrojtjes për paraqitjen e dëshmitarëve.

“Caktimi i kohës kaq të shkurtër për palën mbrojtëse e vë në pozitë të pabarabartë këtë të fundit dhe rrjedhimisht cenohet parimi i barazisë së palëve në procedurë. Fakti që pala mbrojtëse ka paralajmëruar pak dëshmitarë nënkupton që tashmë jemi drejt përfundimit të këtij procesi, i cili nga fundi i këtij viti ose fillimi i vitit të ardhshëm do të duhej të përfundojë në shkallë të parë”, tha ai, raporton RTKlive.

Në seancën përgatitore që do të mbahet në fund të gushtit, do të sqarohen detaje të tjera për rastin e mbrojtjes.