Ish-kryeministri i Shqipërisë, Sali Berisha, ka deklaruar se identiteti i tij është i lidhur ngushtë me Kosovën, duke thënë se “ai është kosovar” dhe se asnjëherë nuk ka bërë dallim mes Shqipërisë dhe Kosovës.
“Zotëri, unë jam kosovar… Tropoja është Kosovë, siç është Mitrovica, Suhareka. Unë mendoj njësoj për Shqipërinë dhe për Kosovën, nuk kam asnjë dallim”.
I pyetur për marrëdhëniet e tij me ish-presidentin Hashim Thaçi, Berisha mohoi të ketë pasur tensione.
“Jo absolutisht! Ka ardhur në zyrë dhe i kam dhënë mbështetje të plotë. Kthehu te mitingu, te deklaratat e mia për UÇK-në”, tha ai.
Ai rrëfeu edhe një episod me një zyrtar britanik, i cili e kishte konsideruar atë “komisar të UÇK-së”.
“Jo, nuk jam komisar. Unë kam mbështetur luftën dhe lëvizjen. Pse është bërë shtëpia jote bazë e tyre? – më pyeti. Sepse është bërë bazë prej traditës dhe bindjes time. Ata janë vrarë për Kosovën”, tregoi Berisha.
Duke folur për katër ish-krerët e Ushtrisë Çlirimtare të Kosovës që po mbahen në Hagë, Berisha u shpreh i bindur për pafajësinë e tyre.
“Deri më sot nuk kam gjetur asnjë dëshmi që fakton krimet e tyre. Ata janë të pafajshëm”, deklaroi ai, duke theksuar se e respekton plotësisht ligjin vendor dhe atë ndërkombëtar.
Në fund, Berisha e cilësoi luftën e UÇK-së si një nga faqet më të ndritura të historisë shqiptare.
“Pas luftërave të Skënderbeut, lufta e UÇK-së është faqja më e ndritur e luftërave të shqiptarëve”, tha ai./tvklan/
