RTK: Kërcënoi se do të aktivizonte mjet shpërthyes në banesë, arrestohet një person në Fushë Kosovë

Policia e Kosovës ka arrestuar një person në rrugën “28 Nëntori” në Fushë Kosovë, pasi dyshohet se kishte kërcënuar se do të aktivizonte një mjet shpërthyes në banesën e tij, në objektet e njohura si “Banesat e Bardha”.

RTK raporton se pas arrestimit, ekipet e specializuara për deminim kanë qenë në vendngjarje, ndërsa banorët kanë qëndruar jashtë banesave deri në sqarimin e situatës.

Sipas informacioneve jozyrtare të televizionit publik, fqinjët e kanë përshkruar të dyshuarin si person problematik, i cili dyshohet se kishte bërë kërcënime edhe më herët.

Deri në momentin e raportimit, nuk kishte konfirmim zyrtar për rastin.