Reuters raporton për Hagën pasi prokurorët e krimeve të luftës kërkuan 45 vjet burgim për Thaçin dhe të tjerët

Prokurorët ndërkombëtarë për krime lufte thanë të hënën se ish-presidenti i Kosovës, Hashim Thaçi, që kontrollonte guerilasit shqiptarë etnikë duhet të shpallet fajtor për krime lufte dhe të dënohet me 45 vjet burg, shkruan agjencia ndërkombëtare e lajmeve, Reuters.

Thaçi dhe tre komandantë të tjerë ish të Ushtrisë Çlirimtare të Kosovës akuzohen për përndjekje, vrasje, torturë dhe zhdukje të detyruara të njerëzve gjatë dhe pak pas kryengritjes së viteve 1998-99, që në fund sollë pavarësinë.

“Të pandehurit kryen krime kundër atyre që i perceptonin si kundërshtarë për të marrë kontrollin mbi Kosovën”, tha prokurorja Kimberly West para gjykatës në Hagë. Ajo shtoi se në vitet 1998 dhe 1999 më shumë se 100 kundërshtarë politikë dhe persona të perceptuar si bashkëpunëtorë me forcat serbe të sigurisë u vranë dhe qindra të tjerë u keqtrajtuan në rreth 50 kampe të mbajtjes nën kontrollin e UÇK-së.

“Kjo çështje ka të bëjë me qëllimin e të katër të pandehurve për të fituar dhe ushtruar kontrollin mbi të gjithë Kosovën”, tha West afër përfundimit të një gjyqi pothuajse trevjeçar në gjykatën speciale për krime lufte të Kosovës në Hagë.

Thaçi, 57 vjeç, i cili ka shërbyer si kryeministër, ministër i jashtëm dhe president i Kosovës së pavarur midis viteve 2008 dhe 2020, dhe të bashkëakuzuarit me të mohojnë të gjitha akuzat.

Avokatët e Thaçit, të cilët pritet t’i japin deklaratat përfundimtare të mërkurën, më herët argumentuan se Thaçi nuk kishte autoritet real mbi UÇK-në dhe komandantët e saj ushtarakë gjatë kryengritjes dhe pasojave të saj.

Prokurorët thonë se Thaçi dhe udhëheqësit e tjerë të UÇK-së zhvilluan një fushatë të dhunshme kundër kundërshtarëve politikë, si dhe ndaj pakicave etnike serbe dhe rome, për të marrë kontrollin e plotë të Kosovës.

Shumica e viktimave të përndjekjes ishin anëtarë të shumicës shqiptare të Kosovës, që përbën 90% të popullsisë, tha prokuroria.

Dhomat e Specializuara të Kosovës, të përbëra nga gjykatës dhe avokatë ndërkombëtarë, u krijuan në vitin 2015 për të trajtuar çështje të krimeve të luftës sipas ligjit të Kosovës kundër ish-guerilasve të UÇK-së. Shumë kosovarë e shohin tribunalin si të njëanshëm ndaj UÇK-së, dhe udhëheqësit si heronj që çliruan Kosovën nga sundimi represiv serb.