Rafuna: ZRrE-ja po kërcënon bizneset, janë duke u vërejtur efektet e para negative

Kreu i Odës Ekonomike të Kosovës, Lulzim Rafuna ka folur për kërkesën e tij publike drejtuar presidentes së shtetit, Vjosa Osmani, kryeministrit në detyrë, Albin Kurti dhe kryesuesit të Bordit të ZRrE-së, Ymer Fejzullahut, që të pezullojnë vendimin e Zyrës së Rregullatorit për daljen e bizneseve në treg të hapur energjetik.

Rafuna potencoi se asnjë biznes nuk është kundër daljes në tregun e lirë.

“Kjo situatë më së miri e dëshmon që ZRrE që nga fillimi nuk e ka përgatitur tregun që të kalojnë nga një çmim i rregullum në tregun e lirë. Dhe theksoj që të gjitha bizneset janë për me dal në treg të lirë, por ku ka konkurrencë për me zgjedh ofertën më të mirë dhe më të lirë”, tha Rafuna në KlanKosova.

Ai tha se efektet e para negative të këtij vendimi tashmë janë duke i vërjetur dhe bëri thirrje që dëmi të mos lejohet të thellohet.

Sipas Rafunës, ZRrE qysh sonte është dashur të mbante mbledhje të jashtëzakonshme dhe ta pezullojë vendimin.