Pas faljes së namazit të Kurban Bajramit në Prishtinë, qytetarët uruan besimtarët myslimanë për festën, duke përcjellë mesazhe paqeje, bashkimi, tolerance dhe solidariteti. Disa prej tyre shprehën edhe shqetësime për përçarjet politike e shoqërore, duke bërë thirrje për më shumë unitet mes shqiptarëve.
Qytetari Rizah Syla për Ekonomia Online tha se Kurban Bajrami është një festë e madhe dhe uroi që ajo të sjellë mirësi e begati për të gjithë.
“Edhe juve për hajër u qoftë. E me të mira inshallah e kalojmë, se kjo festë është shumë festë e madhe, festë njerëzore, me pasur rahmet e bereqet. Një urim për krejt shqiptarët. Edhe në fund të fundit, urime krejt myslimanëve anë e mbanë botës, kah janë e kah s’janë”, tha ai.
Ai pati edhe një mesazh për bashkim dhe mirëkuptim mes shqiptarëve.
“Ja kisha çuar një mesazh që me u bashku, me u bërë në një vend, se të përçarë, e të copëtuar e të kiametit kemi qenë boll. Sot kishe e kena një liri, po ndërmjet veti s’jemi duke u marrë vesh. Edhe krejt shqip po flasim, por jo. Allahu u bëftë rahmet e i udhëzoftë” shtoi ai.
Edhe Ahmet Ajeti uroi festën e Kurban Bajramit për të gjithë besimtarët myslimanë.
“Urime të gjithëve Kurban Bajrami. Allahu i pastë bërë kabull!”, tha ai.
I pyetur nëse kishte një mesazh për politikanët, ai u përgjigj shkurtimisht:
“Për politikanët, ata le të qojnë mirë, se s’kanë mirë hiç ata”, shtoi ai.
Avokati Arianit Koci tha se shpreson që ky vit të sjellë më shumë paqe dhe tolerancë.
“Le të jetë ky vit i paqes dhe i bereqetit. Shpresoj që toleranca ka me mbizotëru këtë vit”, u shpreh Koci.
Ai vlerësoi edhe mesazhin e mbajtur nga myftiu gjatë Hytbes së Bajramit.
“Duhet me e përgëzuar hoxhën sot për një fjalim fantastik. Edhe të anës politike besoj që të gjithë ne duhet në atë frymë të fjalimit të sotëm me u sjellë”, shtoi Koci.
Ndërsa qytetari Fuat Islami përcolli një mesazh të gjatë për paqe, solidaritet dhe harmoni mes njerëzve e popujve.
“E kësaj here, si herave të kaluara, gjithë botës islame anë e mbanë globit, i uroj këtë festë të madhe të Kurban Bajramit. Le të mbretërojë në botë paqja, mëshira, sakrifica, solidariteti mes njerëzve, harmonia, të ketë tolerancë, harmoni, mirëkuptim mes njerëzve, të shtrihet dora e të varfërve, të shtrihet dora e pajtimit mes njerëzve, të ketë harmoni, paqe, por sidomos të ketë solidaritet, harmoni, dhe të ketë ndihmë më shumë mes njerëzve, të ketë ndihmë më shumë në kuptimin human dhe solidar tek shtresa e varfër e popullatës, të ketë harmoni mes shtresave politike, të ketë mirëkuptim mes dallimeve fetare, racore, kombëtare. Dhe gjithsesi në botë të mbretërojë paqja, dhe njëkohësisht uroj që në festat e ardhshme të Kurban Bajramit në botë të ketë më shumë paqe, harmoni dhe të ketë solidaritet mes kombeve, racave dhe feve të ndryshme në botë”, tha qytetari.
