Kuvendi i Kosovës ka miratuar sot rezolutën e propozuar nga Partia Demokratike e Kosovës në mbështetje të krerëve të UÇK-së që po gjykohen në Hagë, me 90 vota për, një kundër dhe asnjë abstenim. Megjithatë, miratimi i saj u parapri nga një përplasje e ashpër mes dy partive kryesore opozitare, shkruan Insajderi.
Ndonëse rezoluta kaloi me 90 vota, grupi parlamentar i LDK-së refuzoi të merrte pjesë në votim, pasi propozimi i tyre për plotësimin e tekstit u hodh poshtë.
Shefja e Grupit Parlamentar të LDK-së, Jehona Lushaku-Sadriu, deklaroi nga foltorja se partia e saj ishte pajtuar që rezoluta të futej në rend dite, por jo edhe me përmbajtjen aktuale të saj.