Policia e Kosovës ka sekuestruar disa armë dhe municion në një hambar në fshatin Kleçkë, në komunën e Zubin Potokut, pas informacioneve të pranuara nga qytetarët.
Sipas njoftimit të Policisë së Kosovës, operacioni është realizuar më 31 tetor nga zyrtarët policorë të Drejtorisë Rajonale të Policisë në Mitrovicë Veri, pas dyshimeve se në atë lokacion mund të kishte armë dhe mjete të tjera ilegale.
Gjatë kontrollit, policia ka gjetur dhe sekuestruar:
Një pushkë gjuetie;
Një pushkë gjuetie gjysmëautomatike;
Një armë automatike;
Një pushkë gjuetie dytytëshe;
Një revole (TT) me një karikator të zbrazët;
33 fishekë për armë të gjata;
Një këllëf me optikë për armë të gjatë;
Dy karikatorë të zbrazët për armë të gjata.
Lidhur me rastin, deri më tani nuk ka persona të arrestuar.
Policia ka bërë të ditur se të gjitha veprimet janë paraqitur te Prokurori i Shtetit, i cili ka udhëzuar inicimin e rastit për veprën penale “Mbajtje në pronësi, kontroll ose posedim të paautorizuar të armëve”.
Policia e Kosovës ka falënderuar qytetarët për bashkëpunimin dhe i ka inkurajuar që të vazhdojnë të raportojnë rastet e dyshimta në numrin emergjent 192.
