Protesta kundër planit për investim në Zvërnec, Rama: Po dëmton imazhin e Shqipërisë dhe sezonin turistik

Kryeministri Edi Rama ka reaguar sërish lidhur me protestën e qytetarëve kundër planit për investimin në Zvërnec, duke theksuar se tubimi nuk ka më lidhje me çështjen fillestare të projektit. Në një postim në rrjetin social X, Rama u shpreh se qytetarët janë të lirë të protestojnë në mënyrë paqësore, por sipas tij kjo protestë po dëmton imazhin e Shqipërisë dhe sezonin turistik, duke krijuar perceptim negativ për vendin si destinacion turistik dhe investimesh.

Ai shtoi se situata po ndikon edhe në ekonomi, për shkak të anulimeve të rezervimeve dhe bllokimeve të lëvizjes, të cilat sipas tij prekin drejtpërdrejt shumë familje të lidhura me industrinë e turizmit.

“Kjo protestë nuk ka më asnjë lidhje me Sazanin a me Zvërnecin, sepse i gjithë dokumentacioni i procesit dhe e gjithë qasja e dokumentuar qeverisë, tregojnë qartë që qeveria është në lartësinë e interesit publik e të standarteve dhe praktikave më të mira ndërkombëtare. Kjo protestë po godet imazhin e Shqipërisë dhe sezonin turistik, duke ushqyer perceptimin negativ e të pavërtetë të një vendi jomiqësor ndaj mjedisit, jomikpritës për investimet e huaja dhe te pasigurtë për turistët. Anullimet e rezervimeve të hoteleve dhe bllokimet e rrugëve paralajmërojnë një sezon jo pozitiv ekonomikisht, për shumë e shumë familje e njerëz që kanë lidhje direkte apo indirekte me zinxhirin e vlerës së industrisë së turizmit.

Kjo protestë që arrin e degradon në një turmë të drejtuar nga mendje të liga dhe duar të këqia drejt rrugës së aeroportit, duke bllokuar natën në rrugë mijëra njerëz në lëvizjen e tyre të lirë, ka brenda saj pikërisht atë të keqen e madhe të ekstremizmit që frymëzon bullizimin online dhe prishjen me pahir të ritmit të jetës së shumicës”, shkruan Rama.

Kryeministri u ndal konkretisht te protesta e zhvilluar mbrëmjen e djeshme (14 qershor) ku qytetarët marshuan drejt Rinasit, duke e cilësuar si të ndikuar nga “mendje dhe duar destruktive”, të cilat sipas tij po dëmtojnë normalitetin dhe lirinë e lëvizjes së qytetarëve.

Rama shprehu keqardhje për të rinjtë që, sipas tij, janë përfshirë në këtë marshim “qorrazi”, duke u bërë thirrje të distancohen nga ndikime të tilla dhe të reflektojnë.

Ai shtoi gjithashtu se protesta ka përfshirë edhe figura publike, të cilat sipas tij janë bashkuar me një narrativë të gabuar mbi situatën.

“Keqardhje për të rejat e të rinjtë e zhgënjyer nga marshimi qorrazi drejt Rinasit me shijen e lirisë e të pavarësisë së tyre dhe në emër të një revolucioni imagjinar, derisa e kuptuan edhe vetë se çfarë budallallëku kishin bërë duke i shkuar mbrapa skuthave të infiltruar nga forcat destruktive, brenda a jashtë, të cilat po bëjnë çmos për ta dëmtuar sa më shumë Shqipërinë. Uroj që të zgjohen sa më parë nga ky jerm dhe të shkëputen një orë e më parë nga mendjet e liga dhe duart e këqia që tanimë e kanë marrë në kontroll protestën. Kjo protestë ka ekzaltuar edhe shumë personazhe me një emër të dëgjuar në mexhelisin e jetës publike. Me mendjet e tyre të cekëta ata i janë bashkuar asaj me mënyra të ndryshme, në bulevard apo në kanalet sociale e mediatike, me idenë se deti u bë kos, qeveria po mbytet, një orë e re erdhi për lugët në brezat e tyre”, shkruan Rama.

Kryeministri theksoi se nga kjo situatë mund të nxirren mësime, por sipas tij, përfituesit politikë do të jenë qeveria dhe Partia Socialiste, të cilat do të dalin më të forta pas kalimit të kësaj periudhe.

“Por nëse ka përfitues të vërtetë nga kjo protestë, ata janë vetëm dy: Qeveria Shqiptare, e cila do të nxjerrë patjetër mësimet që i duhen nga pjesa e çiltër e protestës, duke adresuar si duhet shqetësimet legjitime të asaj pjese dhe Partia Socialiste, e cila kur të shpërndahet mjegulla do t’i zhgënjejë rëndë të gjithë kundërshtarët e saj, duke u shfaqur më e madhe dhe më e fortë në qendër të skenës politike të Shqipërisë”, thekson Rama.