Presidenti i Iranit: Të gatshëm ta rihapim Ngushticën e Hormuzit, nëse SHBA-ja përmbush kushtet

Presidenti iranian Masoud Pezeshkian ka deklaruar se Irani ka arritur një marrëveshje me Omanin për itinerarin e kalimit të anijeve përmes Ngushticës së Hormuzit dhe se kjo rrugë strategjike detare mund të rihapet nëse Shtetet e Bashkuara përmbushin angazhimet e tyre.

“Jemi dakorduar me Omanin për itinerarin e kalimit përmes Hormuzit dhe, nëse SHBA-ja përmbush angazhimet e saj sipas memorandumit të mirëkuptimit, ne do ta hapim ngushticën”, deklaroi Pezeshkian, sipas agjencisë iraniane IRNA.

Presidenti iranian tha se plani për kalimin përmes ngushticës i është komunikuar edhe liderit suprem të Iranit. Sipas tij, Teherani kërkon që SHBA-ja të përmbushë angazhimet për heqjen e sanksioneve dhe bllokadës, zhbllokimin e aseteve iraniane, nisjen e investimeve dhe përfundimin e luftës në Liban.

Pezeshkian tha gjithashtu se Këshilli Suprem i Sigurisë Kombëtare kishte arritur një konsensus të gjerë për marrëveshjen, me 12 nga 13 anëtarët që votuan pro.

Sipas presidentit iranian, në kuadër të marrëveshjes ishin parashikuar edhe negociata për zhbllokimin e fondeve iraniane dhe investime që mund të arrinin në 300 miliardë dollarë. Megjithatë, ai pretendoi se marrëveshja dështoi pasi pala amerikane nuk respektoi angazhimet e saj.

Irani dhe Omani kanë zhvilluar bisedime për menaxhimin e transportit detar përmes Ngushticës së Hormuzit, një prej rrugëve më të rëndësishme të transportit të naftës në botë.

Teherani ka deklaruar se është i gatshëm të rikthejë qarkullimin detar në nivelet e mëparshme, nëse plotësohen kushtet e përcaktuara në marrëveshjen e diskutuar me Washingtonin.