Policia e Kosovës sjell frymën sportive përmes Garës së Auto Sllallom me Vetura Elektrike

Me synim promovimin e sigurisë në trafik, mbrojtjen e mjedisit dhe përdorimin e teknologjive të qëndrueshme Policia e Kosovës, me mbështetjen e Drejtorit të Përgjithshëm të PK-së, Këshillit Mbikëqyrës të Shoqatave Sportive të Policisë së Kosovës, në bashkëpunim me Auto Moto Club Kosova (AMCK) dhe Federatën e Auto Sporteve të Kosovës (FASK), organizoi Garën e Auto Sllallomit me Vetura Elektrike.

Në aktivitet morën pjesë zyrtarë policorë nga Drejtoria e Përgjithshme dhe drejtoritë rajonale, të cilët garuan në disiplinën e Auto Sllallomit sipas standardeve sportive dhe të sigurisë.

Gara u zhvillua në frymën e motos “Në shërbim të Atdheut, deri në fund”, duke nderuar kujtimin e zyrtarëve policorë të rënë në krye të detyrës. Aktiviteti promovoi kulturën e drejtimit të sigurt, profesionalizmin, disiplinën dhe frymën e bashkëpunimit.

Përmes organizimeve të tilla, Policia e Kosovës vazhdon të inkurajojë ndërgjegjësimin për sigurinë rrugore, mbrojtjen e mjedisit, zhvillimin e aktiviteteve sportive dhe forcimin e bashkëpunimit institucional, në funksion të shërbimit ndaj qytetarëve dhe publikut në përgjithësi.