PDK i kërkon Albulena Haxhiut t’ia emërojë anëtarin e dytë në KQZ

Partia Demokratike e Kosovës ka kërkuar nga Ushtruesja e detyrës së Presidentes, Albulena Haxhiu, që ta emërojë anëtarin e dytë të kësaj partie në KQZ.

Anëtari i Kryesisë së Partisë Demokratike të Kosovës, Betim Gjoshi, mosemërimi i përfaqësuesit të PDK-së do të ishte shkelje e Kushtetutës së Kosovës, por edhe dëmtim i përfaqësimit opozitar në institucionin e zgjedhjeve dhe rrezikim i legjitimitetit të zgjedhjeve.

“Askush nuk duhet që të shfrytëzojë KQZ-në për të arritur qëllime politike përmes përfaqësimit jokushtetues. Askush nuk mund ta përdorë KQZ-në për përfitime politike, në kundërshtim me rendin kushtetues”, ka shkruar Gjoshi.

Gjoshi tutje ka thënë se zgjedhjet e 28 dhjetorit nuk janë mbajtur për KQZ, por për Kuvendin e Kosovës, në të cilin kanë arritur të hyjnë 4 grupe parlamentare.

“Andaj, në rrethana të tilla, meqenëse pas këtyre zgjedhjeve në Kuvend ishin vetëm 4 grupe parlamentare shqiptare, pra në mungesë të numrit të mjaftueshëm prej 6 grupeve, anëtarët shtesë emërohen nga grupet më të mëdha parlamentare, që në këtë rast janë Lëvizja Vetëvendosje dhe Partia Demokratike e Kosovës”, thuhet në reagim.