Pas 25 viteve shërbim në Policinë e Kosovës, sot është pensionuar zyrtari Selmon Krasniqi, shkruan Demos.
Krasniqi në vitet e para pas formimit të Policisë së Kosovës, ai u angazhua si staf civil, duke dhënë një kontribut të çmuar në funksionimin dhe mbarëvajtjen e saj. Përplot 25 vite shërbim, Selmoni u shqua për korrektësinë, punën e ndershme dhe respektin që fitoi si nga kolegët ashtu edhe nga qytetarët.
Gjatë gjithë karrierës së tij, ai tregoi shembullin e një njeriu të qetë, të urtë dhe të përkushtuar, duke lënë gjurmë të pashlyeshme në institucionin ku shërbeu. Kontributi i tij nuk u mat vetëm me vite pune, por me besnikëri, seriozitet dhe dashuri ndaj detyrës dhe atdheut.
Me rastin e pensionimit, Selmon Krasniqi lë pas një karrierë të ndritur dhe një kujtim të mirë për të gjithë ata që patën fatin të punojnë pranë tij. Ai mbetet një shembull frymëzues për gjeneratat e reja, duke dëshmuar se puna e ndershme dhe përkushtimi janë vlera që vlejnë përjetësisht.
