Xhamia e Ibrit, e ndërtuar në vitin 1777 dhe e djegur më 2 maj 1999, do të rindërtohet në kuadër të angazhimeve institucionale për ruajtjen e trashëgimisë kulturore në Kosovë. Kështu bëri të ditur sot kryeministri Albin Kurti.
Ky zhvillim vjen pasi më herët në Kuvend, Lëvizja Vetëvendosje nuk e kishte përkrahur amandamentin për përfshirjen e këtij projekti në buxhet. Në votim kishin marrë pjesë 21 deputetë që votuan pro, 51 kundër dhe 6 abstenuan.
Gjatë fushatës zgjedhore, kryeministri Albin Kurti kishte dhënë premtime të shumta, ndër to edhe rindërtimin e Xhamisë së Ibrit, e cila ishte djegur gjatë luftës nga forcat serbe.
“Xhamia e Ibrit sivjet i bën 250 vjet që nga ndërtimi, por ajo u dogj më 2 maj 1999. Prandaj, në mandatin tonë të ardhshëm do ta rindërtojmë këtë xhami. Ajo është pjesë e trashëgimisë sonë kulturore. Të gjitha objektet e trashëgimisë kulturore, pa dallim, që janë dëmtuar, do t’i rinovojmë dhe rindërtojmë”, kishte deklaruar ai në hapjen e fushatës në Mitrovicë të Jugut.
