Pal Lekaj: Askush nuk ka të drejtë ta përbuzë mërgatën – rruga drejt lirisë pa ta do të ishte e dhimbshme

“Mërgata jonë nuk është vetëm histori,është themel i lirisë dhe shtyllë e zhvillimit të Kosovës”, kështu vlerëson Pal Lekaj nga AAK.

Ai u shpreh mirënjohës për kontributin e mërgatës, duke e cilësuar si kyçe në precesin e lirisë.

“Kur vendi ishte në errësirë, ata ndezën dritën e shpresës. Kur lufta kërkonte sakrificë, ata dhanë gjithçka, nga djersa e punës së rëndë deri te mbështetja e pakursyer për çlirimin e vendit. Pa mërgatën, rruga jonë drejt lirisë do të ishte shumë më e gjatë dhe më e dhimbshme.

Sot, ata vazhdojnë të jenë zemra që rreh fort për Kosovën ,me investime, me dije, me përvojë dhe me dashuri të pashuar për vendin e tyre”, tha ai.

Lekaj tha se përbuzja ndaj tyre nuk duhet të lejohet.

“Mërgata janë familjet tona. Janë prindërit, vëllezërit e motrat tona që sakrifikuan gjithçka për një të ardhme më të mirë.

Prandaj, askush nuk ka të drejtë t’i përbuzë. Asnjë fjalë e ulët nuk mund ta zbehë madhështinë e kontributit të tyre. Respekt përherë për mërgatën, krenaria jonë e përbashkët!”, tha ai.