OVL-UÇK: Për pesë vite me radhë, ky pushtet e la luftëtarin e UÇK-së pa pension meritor, u bë në bashkëpunim me Listën Serbe

Organizata e Veteranëve të Luftës ka dal me reagim në Ditën e Veteranëve të UÇK-së.

Në reagim kritikohet qasja e pushtetit të Kurtit ndaj veteranëve për pesë vite

OVL-UÇK tha se pushteti i Kurtit në bashkëpunim me Listën Serbe e la pa pension meritor luftëtarin e UÇK-së.

Postimi i plotë:

REAGIM

Sipas ligjit në fuqi, 30 Dhjetori shënohet si Dita e Veteranëve të UÇK-së.

Një ditë që duhet të ishte reflektim shtetëror, respekt institucional dhe përulje ndaj sakrificës së atyre që e sollën lirinë.

Për pesë vite me radhë, ky pushtet e la luftëtarin e UÇK-së pa pension meritor, duke e nënçmuar dinjitetin e atij që rrezikoi jetën për liri.

Kjo u bë me vetëdije dhe me hile politike, në bashkëpunim me Listën Serbe.

U toleruan deklarata fyese, përçmuese dhe linçuese ndaj veteranëve të UÇK-së.

U lejua që luftëtarët të etiketohen, të poshtërohen dhe të trajtohen si barrë, pa asnjë mbrojtje shtetërore.

Madje, u tha publikisht se “më mirë të paguheshin mercenarët, sesa ata që e çliruan vendin”.

Kjo është një politikë e ftohtë, e qëllimshme dhe e organizuar kundër UÇK-së.

Sot, përveçse që nuk u trajtuan me dinjitet për vite me radhë, veteranët nuk u kujtuan as simbolikisht.

Asnjë aktivitet shtetëror, asnjë vizitë te varret e dëshmorëve nga institucionet.

Kjo heshtje është qëndrim politik.

Dhe ky qëndrim tregon se, fatkeqësisht, shteti po përpiqet të shkëputet nga lufta që e solli në jetë.

OVL UÇK ua rikujton institucioneve:

Kosova nuk ka lindur nga neutraliteti,as nga administrata,as nga konferencat, por nga gjaku i dëshmorëve dhe sakrifica e veteranëve të UÇK-së.