Presidentja Vjosa Osmani ka falenderuar Turqinë për sistemet raketore anti-tank OMTAS që sot i pranoi Kosova, e që ishin blerë nga ky shtete në dhjetor të vitit 2023.
Në faqen e saj në Facebook, Osmani ka ndarë foto të sistemeve të pranuar shkruar në turqisht “Faleminderit Turqi”, teksa ka vendosur flamujt e dy vendeve.
Për pranimin e dërgesës me këto sisteme, njoftoi Ministri në detyrë i Mbrojtjes, Ejup Maqedonci.
Maqedonci ka thënë se ky është një sistem modern raketor anti-tank me rreze të mesme veprimi, i zhvilluar për të neutralizuar mjete të blinduara moderne, përfshirë tanke me mbrojtje reaktive, si dhe fortifikata mbrojtëse ushtarake.
“Rritja e llojllojshmërisë dhe sasisë së sistemeve raketore anti-tank për ushtrinë tonë ka për qëllim mbulimin e distancave të ndryshme të veprimit, terreneve dhe skenarëve të kërcënimit, duke rritur fleksibilitetin operacional”, ka shkruar Maqedonci.
