Në Gjykatën Themelore të Ferizajt ka nisur seanca e shqyrtimit fillestar për rastin e vrasjes së policit Muhamed Lika.
Në sallë janë paraqitur të pandehurit H.B., R.M., V.Ç., E.L., dhe Sh.K., të akuzuar për vrasje të rëndë, si dhe D.G., i akuzuar për “dhënien e ndihmës pas kryerjes së veprave penale”.
Ndërkohë, sipas aktakuzës, më 1 prill 2025, rreth orës 23:00, në Kaçanik, afër vendit ku ka jetuar viktima, të pandehurit në bashkëkryerje me të miturin, me dashje dhe përgatitje paraprake kanë privuar nga jeta tani të ndjerin zyrtarin policor, rreshter Muhamed Lika, me armë zjarri, ku si pasojë e të shtënave nga plagët ndërron jetë, e pastaj largohen nga vendi i ngjarjes.
“Prokurori i çështjes, me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur të shpallen fajtor për veprën penale për të cilën akuzohen dhe të dënohen sipas ligjit, si dhe ka propozuar që të pandehurve t’u vazhdohet masa e paraburgimit deri në përfundim të shqyrtimit gjyqësor ”, thuhet në njoftim.
