Nga ‘Duaje tënden’ te ‘Mbylle tënden’, lufta e çoroditur e pushtetit ndaj prodhuesve

Pas më shumë se një dekade, nga “Duaje tënden!” në “Mbylle tënden”, duket se ngjan me një luftë të çoroditur të pushtetit të Lëvizjes Vetëvendosje, ndaj prodhuesve vendorë. Sot kjo u dëshmua me qumështoren Vita!

Me një urdhër të ministrit të Bujqësisë, Armend Muja, për inspektime pa paralajmërim, zyrtarët e shtetit iu vërsulën prodhuesit që mban 500 punëtorë.

Kompania e mbylli përkohësisht qumështoren dhe i çoi mesazh të fuqishëm pushtetit të Albin Kurtit, partia e të cilit sa ishte në opozitë u bënte thirrje qytetarëve të blinin produkte të Kosovës dhe institucioneve t’i mbronin e promovonin bizneset vendore.

E njëjta parti që ia dha Vitës vulën “Duaje tënden”, sot ka “vendosur” ta kthejë në “Mbylle tënden”.

Pas vendimit për mbylljen e kompanisë, kanë filluar reagimet e figurave politike, bizneseve kosovare si dhe të qytetarëve, me ç’rast kanë nisur edhe protestat e fermerëve në mbështetje të Vitës.