Pas përditësimit më të fundit të rezultateve nga numërimi i votave me postë, Lëvizja Vetëvendosje ka siguruar sërish mandatin e 52-të në Kuvendin e Kosovës.
Rikalkulimi i rezultateve ka ndikuar edhe në ndarjen e mandateve të partive tjera, ku Partia Demokratike e Kosovës ka humbur një ulëse parlamentare, duke zbritur nga 23 në 22 deputetë.
Ndërkohë, sipas rezultateve të deritanishme, Lidhja Demokratike e Kosovës vazhdon të ketë 19 mandate, ndërsa Aleanca për Ardhmërinë e Kosovës mban 7 ulëse në Kuvend.
Procesi i numërimit të votave me postë nuk ka përfunduar ende. Deri më tani janë numëruar 93.63 për qind e votave, çka lë të hapur mundësinë për lëvizje të tjera në ndarjen përfundimtare të mandateve.
