Zyra e NATO-s në Bruksel ka deklaruar se çdo hap i mëtejshëm për të thelluar marrëdhëniet e aleancës me institucionet në Kosovë kërkon dakordim të përbashkët nga të gjithë aleatët.
Sipas një zëdhënësi të aleancës, NATO u ka bërë thirrje institucioneve në Kosovë që të forcojnë qeverisjen e mirë.
Po ashtu, ai ka theksuar se NATO mbetet e përkushtuar plotësisht ndaj stabilitetit në Ballkanin Perëndimor, përfshirë edhe përmes misionit të saj KFOR.
“Ne i inkurajojmë institucionet në Kosovë që të konsolidojnë qeverisjen e mirë, për të mirën e të gjithë njerëzve që jetojnë në Kosovë. NATO-ja mbetet plotësisht e përkushtuar ndaj stabilitetit në Ballkanin Perëndimor, përfshirë edhe përmes misionit KFOR”, tha një zëdhënës i aleancës për REL.
Politika e “dyerve të hapura” e NATO-s bazohet në Nenin 10 të Traktatit të Uashingtonit, i cili përcakton se anëtarësimi është i hapur për çdo “shtet evropian që është në gjendje t’i çojë përpara parimet e këtij Traktati dhe të kontribuojë në sigurinë e zonës së Atlantikut të Veriut”.
Kosova e ka të deklaruar prej kohësh synimin për anëtarësim në aleancë dhe ka ndërmarrë hapa në ndërtimin e kapaciteteve të sigurisë në përputhje me standardet e saj, por procesi mbetet i bllokuar në aspektin politik, pasi katër vende anëtare të NATO-s nuk e njohin ende pavarësinë e Kosovës, dhe çdo zgjerim i ri kërkon konsensusin e të 32 aleatëve.
