Mustafa reagon ashpër pas incidentit verbal me Azemin në seancë: Nuk e toleroj ofendimin, dinjitetin s’ia kam borxh askuj

Deputeti i LDK-së, Besian Mustafa, ka reaguar publikisht pas një incidenti verbal gjatë seancës së Kuvendit që po mbahet sot, duke akuzuar për sjellje të papërshtatshme nga Egzon Azemi.

Përmes një postimi në Facebook, Mustafa ka bërë të ditur se gjatë një diskutimi me kryesuesin e seancës, z. Gola, është ndërprerë nga Azemi. Sipas tij, pasi kishte kërkuar që të mos ndërhyhej deri në përfundimin e diskutimit, është përballur me një ofendim verbal.

“ Mu kthye ‘mos u bo kastravec ktu’” , ka shkruar Mustafa, duke theksuar se nuk pranon ofendime nga askush.

Ai ka shtuar se, ndonëse është natyrë e qetë, nuk e toleron cenimin e dinjitetit të tij, duke e cilësuar të vështirë përballjen me një nivel të tillë komunikimi.

Postimi i tij:

”Të nderuar qytetarë,

Sot, isha duke diskutuar me z. Gola që po udhëhiqte seancën.

Erdhi Egzon Azemi dhe na ndërhyri.

I kërkova të mos na ndërhyjë deri ta përfundojmë diskutimin z. Gola dhe unë.

Mu kthye “mos u bo kastravec ktu”.

Nuk e duroj ofendimin nga askush, më së paku nga dikush si ai.

Nga natyra jam shumë i qetë, por dinjitetin tim s’ia kam borxh askuj.

Nuk është e lehtë të përballesh me nivel të tillë që përfaqësojnë njerëz si ai.

I juaji përherë,

Besiani