Mashtrimi mbi prodhimin e dronëve, Kurti për kompaninë nga Gjilani: Nuk i di të gjitha hollësitë

Pas vizitës tek Oda e Mjekëve, kryeministri në detyrë, Albin Kurti është ndalur të flas për mediat.

Ai është pyetur në lidhje me kompaninë nga Gjilani që po pretendon se ndërton dronë ushtarak, e të cilën Kurti gjatë fushatës e kishte vizituar.

Kurti tentoi që në mënyrë diplomatike të shmang pyetjen, duke thënë se nuk i di hollësitë e gjitha kompanive që i ka vizituar, edhe pse ai e kishte publikuar në faqen e tij në Facebook vizitën.

“Unë kam vizituar me qindra kompani anembanë Kosovës gjatë këtyre 4 viteve. Nuk mund të them se i di të gjitha hollësitë e secilës kompani, por natyrisht jam i hapur të dëgjoj edhe kritikat kur diçka nuk ka qenë ashtu siç më është prezantuar. Megjithatë, duhet pasur parasysh se kur shqyrtohen aspektet e hollësishme dhe profesionale, nuk mund ta di paraprakisht se cilat janë ato saktësisht në secilën kompani.”, tha Kurti.