Prokuroria Themelore në Pejë ka pranuar nëntë kallëzime penale ndaj 49 personave për manipulim të votave në procesin zgjedhor të 28 dhjetorit 2025, ndërsa pritet që numri i kallëzimeve të arrijë në 31 ndaj rreth 200 personave, kryesisht kryesues dhe komisionerë të vendvotimeve në komunën e Pejës.
Zëdhënësi i Prokurorisë Themelore në Pejë, Shkodran Nikçi,ka bërë të ditur se hetimet janë në zhvillim dhe po realizohen në koordinim të plotë me Policinë e Kosovës.
“Në kuadër të hetimeve që jemi duke ndërmarrë për procesin zgjedhor të manipulimit të votave përkatësisht të numërimit të kandidatëve të subjekteve politike. Prokuroria Themelore në Pejë, për komunën e Pejës deri më tani ka pranuar nëntë kallëzime penale ndaj 49 personave. Ndërkaq për këtë komunë priten të pranohen gjithsej 31 kallëzime penale ndaj 200 personave, kryesisht kryesues dhe komisionerë të vendvotimeve. Ndërkaq më pas Prokurori i Shtetit në koordinim të plotë me Policinë e Kosovës do t’i ndërmarrë të gjitha veprimet e nevojshme ligjore”, tha ai për Ekonomia Online.
