Lumir Abdixhiku: Kosova sot ka Kuvend funksional, rruga për Qeverinë e re është e hapur

Kryetari i Lidhjes Demokratike të Kosovës, Lumir Abdixhiku, ka deklaruar se sot Kosova ka një Kuvend funksional, pas zgjedhjes së nënkryetarit të pestë të Kuvendit, duke i hapur rrugë formimit të Qeverisë së re brenda afateve kushtetuese.

“Për 177 ditë me radhë, ata kanë thënë se i kanë votat. Tani le ta dëshmojnë këtë fakt para qytetarëve të Kosovës,” u shpreh Abdixhiku, duke iu referuar deklaratave të Lëvizjes Vetëvendosje për formimin e shumicës parlamentare.

Sipas Abdixhikut, vendimi i LDK-së për të votuar nënkryetarin e pestë erdhi pas një analize juridike të thellë, duke vlerësuar se aktgjykimi i fundit i Gjykatës Kushtetuese ka hapur rrugën për konstituimin e Kuvendit.

Ai theksoi se mbajtja e vendit të bllokuar për më shumë se pesë muaj për një pozitë “tërësisht formale dhe të parëndësishme” ka qenë një akt i papërgjegjshëm që ka dëmtuar interesin e Republikës.

LDK nënvizon se ka vepruar si një parti e përgjegjshme, për t’i dhënë fund bllokadës dhe për të shmangur shkeljet kushtetuese të mundshme nga një qeveri që e cilëson si “pa legjitimitet dhe pa autorizime ligjore”.