Largimi i gazetares nga puna, reagon RRGK

Rrjeti i Grave Gazetare të Kosovës shpreh shqetësim të thellë dhe reagon fuqishëm ndaj vendimit të menaxhmentit të Transmetuesit Publik-RTK, për të mos vazhduar kontratat e punës së gazetareve Hana Marteti dhe Edina Avdiu.

Mosvazhdimi i kontratave pa një proces të qartë dhe transparent, pa asnjë vërejtje profesionale apo disiplinore gjatë tre viteve të punës, si dhe pa vlerësim profesional vjetor, përmban elemente të një praktike ndëshkuese dhe potencialisht hakmarrëse ndaj kolegeve gazetare. Një qasje e tillë krijon klimë pasigurie dhe frike për gratë në media, të cilat përballen jo vetëm me trysni të vazhdueshme profesionale, por edhe me barriera strukturore dhe paragjykime gjinore.

Veprime të tilla nga një institucion publik, i financuar nga qytetarët e Republikës së Kosovës, dëmton seriozisht besimin e publikut në RTK dhe dërgojnë një mesazh shqetësues për pozitën dhe sigurinë e grave gazetare në vendin e punës. Rasti bëhet edhe më i rëndë kur merret parasysh fakti se njëra nga gazetaret, Edina Avdiu, është në periudhë shtatzënie.

Rrjeti i Grave Gazetare të Kosovës shpreh solidaritet të plotë me Hana Martetin dhe Edina Avdiun dhe kërkon transparencë të menjëhershme nga menaxhmenti i RTK-së lidhur me arsyetimin e këtij vendimi.

Çdo veprim që cenon sigurinë në punë, barazinë gjinore apo që mund të interpretohet si masë ndëshkuese përbën shkelje serioze ligjore dhe etike, për të cilat përgjegjësia institucionale dhe individuale nuk mund të shmanget.

Andaj, Rrjeti do t’i mbështesë gazetaret në çdo hap institucional dhe ligjor për ta sfiduar këtë vendim, duke mbrojtur jo vetëm të drejtat e tyre individuale, por edhe standardet e barazisë gjinore, dinjitetit dhe sigurisë në punë për të gjitha gratë gazetare në Kosovë.