Këngëtari dhe ish-deputeti Labinot Tahiri ka ndarë një mesazh mirënjohjeje për rreth 50 luftëtarë të UÇK-së, të cilët po marrin rrugën drejt Hagës, në pritje të zhvillimeve lidhur me ish-krerët e UÇK-së.
Tahiri ka bërë të ditur se për ta ka shtruar një drekë, duke e cilësuar këtë si një gjest të vogël mirënjohjeje për kontributin e tyre gjatë luftës.
“Sot dua të them vetëm pak fjalë për këta burra që po marrin rrugën drejt Hagës, në pritje dhe me shpresën për lirimin e ish-krerëve të UÇK-së”, ka shkruar Tahiri.
Ai ka kujtuar sakrificën e luftëtarëve, duke theksuar se ata kishin lënë familjet dhe jetën e tyre për t’iu bashkuar luftës për liri.
“Për mua, kjo drekë për rreth 50 luftëtarë ishte vetëm një gjest i vogël mirënjohjeje. Ata dikur e lanë bukën në sofër, i lanë familjet dhe jetën e tyre, dhe i kapën pushkët për lirinë që ne e gëzojmë sot”, ka shkruar ai.
