Kushtetuesja bashkon lëndët e dorëzuara nga PDK

Gjykata Kushtetuese ka njoftuar se i ka bashkuar dy lëndët e dorëzuara javën e kaluar nga PDK.

Në një përgjigje për Indeksonline bëhet me dije se tanimë kjo lëndë është duke u shqyrtuar në përputhje me Kushtetutën e Republikës së Kosovës, Ligjin për Gjykatën Kushtetuese dhe Rregullorën e punës së Gjykatës.

“Kërkesat e dorëzuara nga Partia Demokratike e Kosovës përkitazi me konstituimin e Kuvendit dhe formimin e Qeverisë janë bashkuar. Kjo lëndë është duke u shqyrtuar në përputhje me Kushtetutën e Republikës së Kosovës, Ligjin për Gjykatën Kushtetuese dhe Rregulloren e punës së Gjykatës”, thuhet në përgjigjen e Gjykatës Kushtetuese.

Kujtojmë se PDK ka dërguar dy lëndë në këtë gjykatë, e para ka të bëjë me vonesën në konstituimin e Kuvendit, ndërsa e dytë në kushtetutshmërinë e zgjedhjes së qeverisë.

Gjykata nuk ka bërë me dije nëse ky subjekt mund t’i tërheq këto lëndë.