Pas përfundimit të sesioneve të diskutimeve në kuadër të Samitit të Procesit të Berlinit, në margjina të tij, kryeministri në detyrë, Albin Kurti, u takua me kryeministrin e Mbretërisë së Bashkuar, Keir Starmer.
Kurti shprehu vlerësimin e lartë për udhëheqjen e MB-së dhe organizimin e Samitit të 12-të të Procesit të Berlinit, i cili po mbahet në Londër për herë të dytë pas vitit 2018.
Siç njofton Kryeministria, ata diskutuan rreth temave kryesore të Samitit, gjegjësisht siguria, rritja dhe migracioni, teksa thuhet se Kurti theksoi rëndësinë e rolit të Britanisë në fuqizimin e bashkëpunimit rajonal, sigurisë dhe paqes.
“Në vijim biseduan për mënyrat e thellimit të bashkëpunimit dhe përkrahjes në fusha me interes të përbashkët si energjia, siguria dhe mbrojtja, infrastruktura dhe edukimi. Kryeministri Kurti veçoi bashkëpunimin në fushën e mbrojtjes, gjersa vendi ynë po vazhdon investimet në këtë drejtim”, u tha në njoftim.
Kurti thuhet se falënderoi Mbretërinë e Bashkuar për lajmin se Forcat e Armatosura britanike do të vazhdojnë mbështetjen për KFOR-in, për të paktën edhe tre vjet, “si dhe për thirrjen e djeshme në seancën e OKB-së për njohjen e Kosovës nga shtetet anëtare dhe për dorëzimin e terroristit Radoiçiq nga ana e Serbisë, i cili vijon të mbetet i lirë pas sulmit terrorist në Banjskë duke përbërë rrezik për sigurinë”
