Kurti pret shefin e EULEX-it, theksohet nevoja për reforma në drejtësi dhe digjitalizim të sistemit

Kryeministri i Kosovës, Albin Kurti, ka pritur në takim shefin e Misionit të EULEX-it, Giovanni Pietro Barbano, ku është diskutuar për bashkëpunimin në fushën e sundimit të ligjit dhe sfidat në sistemin e drejtësisë. Sipas njoftimit nga Zyra e Kryeministrit, gjatë takimit u vlerësua puna e EULEX-it në Kosovë, me theks të veçantë roli i tij në monitorimin e institucioneve të drejtësisë dhe kontributi në avancimin e sundimit të ligjit.

Në këtë drejtim, të dyja palët u pajtuan se sistemi gjyqësor vazhdon të përballet me sfida, veçanërisht në aspektin e vonesave në trajtimin e rasteve, menaxhimit joefikas dhe mungesës së konsistencës në vendimmarrje. U theksua nevoja për reforma të thella që do të rrisin disiplinën, llogaridhënien dhe efikasitetin në gjyqësor.

Po ashtu, në takim u theksua rëndësia e digjitalizimit të sistemit gjyqësor dhe prokurorial, si një element kyç për rritjen e transparencës dhe llogaridhënies. U vlerësua e domosdoshme që sistemi elektronik për menaxhimin e lëndëve të zbatohet nga të gjithë gjyqtarët dhe prokurorët.

Në përfundim, u ritheksua se EULEX-i mbetet një partner i rëndësishëm për Kosovën në forcimin e sundimit të ligjit, ndërsa kryeministri Kurti riafirmoi përkushtimin e Qeverisë për vazhdimin e reformave që synojnë një sistem drejtësie më efikas, transparent dhe të përgjegjshëm