Kryeministri dhe kryetari i Lëvizjes Vetëvendosje, Albin Kurti, ka reaguar përmes një postimi në Facebook pas përfundimit të fushatës dhe rezultateve preliminare të zgjedhjeve, duke falënderuar qytetarët për mbështetjen e dhënë.
Kurti ka theksuar se gjatë dhjetë ditëve të fushatës ka zhvilluar qindra takime dhe tubime anembanë vendit, ku, sipas tij, është pritur me ngrohtësi dhe besim nga dhjetëra mijëra qytetarë.
“Na pritët me ngrohtësi e besim, e për këtë ju falënderoj përzemërsisht. U angazhuat pa kursim për fitoren e VETËVENDOSJE!-s me partnerë, për fitoren tuaj”, ka shkruar Kurti.
Postimi i tij i plotë:
Mirëdita të dashur qytetarë,Në dhjetë ditë fushatë, dhjetëra mijëra duar të shtrënguara e mijëra dyer të hapura nga ju në qindra takime e tubime anembanë. Na pritët me ngrohtësi e besim, e për këtë ju falënderoj përzemërsisht. Jeni shumë, madje aq shumë sa shumicës nuk ua njohim e dimë emrin. Dhe, u angazhuat pa kursim për fitoren e VETËVENDOSJE!-s me partnerë, për fitoren tuaj. Të dashur bashkatdhetarë që erdhët nga Evropa, Amerika e nga çdo cep i botës, ose që votuat me postë apo fizikisht pardje në ambasadat e konsullatat tona, u jemi mirënjohës përjetë për kontributin tuaj të pamatshëm për liri e shtet dhe komb, si dhe për përkrahjen vendimtare që e bëri fitoren në këto zgjedhje aq madhështore saqë historike.Puna vazhdon, siguria e begatia do të shtohen. Na priftë e mbara!
